٢٦
١ و اغریپاس پولسه كندك ایچون سویله‌مكه سڭا اذن وار دیدكده پولس النی اوزادوب جواب ویره‌رك٢ ای ملِك اغریپاس یهودیلر طرفندن شكایت اولندیغم شیلرك جمله‌سی حقنده بو كون سنڭ حضوركده جواب ویره‌جكمدن كندمی بختیار عد ایده‌رم.٣ خصوصا كه یهودیلرك هپ آیینلری ایله مسئله‌لرینه واقف سین بو سببدن نبی صبرله دیكله‌مكزی رجا ایدرم٤ ابتدادن اورشلیمده ملتمك اراسنده صباوتمدنیرو نصل یاشادیغمی یهودیلرك جمله‌سی بیلورلر٥ چونكه (شهادت ایتمك استرلر ایسه) دینمزك اك دقتلو فرقه‌سنه كوره فریسی یاشادیغمی اوّلدن برو بیلورلر٦ و بن شمدی الله طرفندن اجدادمزه ویریلوب اون ایكی سبطمزك دخی كیجه كوندوز دوام اوزره عبادت ایده‌رك نائل اولمغه امید ایتمكده اولدقلری وعدك امیدی ایچون محاكمه اولنمق اوزره طوریورم٧ بن اول امید ایچون یهودیلر طرفندن شكایت اولنیورم ای ملِك [اغریپاس].٨ اللهك اولولری احیا ایلمسی نیچون عند ڭزده اینانلماز شی عد اولنور.٩ واقعا بن كندم ناصرتلو عیسانك اسمنه مخالف پك چوق شیلر ایتمك بڭا واجب ایدیكی ظننده ایدم١٠ بونی دخی اورشلیمده اجرا ایدوب باش كاهنلردن صلاحیت آله‌رق مقدّسلردن نیچه‌لرینی حبسخانه‌لرده حبس ایدوب قتل اولندقلرنده بن دخی رأی ویردم١١ و جمله سیناغوغلرده چوق دفعه انلره عذاب ایدوب كفر ایتمكه اجبار ایدر ایدم و علیهلرینه غاینله حدتلنه‌رك تا اجنبی شهرلره دخی تعدّی ایدر ایدم١٢ و بو صره‌ده باش كاهنلر طرفندن ویریلان صلاحیت و مأموریتله دمشقه دخی كیدر ایكن١٣ ای ملِك یولده اوكله وقتی سمادن بنم و یولداشلرمك اطرافنده كونشك ضیاسندن عظیم بر نور پارلامش كوردم١٤ و جمله‌مز یره دوشوب عبرانی لساننده ای ساول ساول بڭا نیچون تعدّی ایدیورسین سڭا اوكندره‌لره قارشو دپمك كوجدر دیو بڭا سویلیان بر صدا ایشیتدم١٥ بن دخی افندی سن كیم سین دیدیكمده رب بن سنڭ تعدّی ایتدیكك عیسی‌ایم١٦ لكن قالق ایاق اوزری طور زیرا كوردیكك و سڭا كورینه‌جكم شیلره سنی مأمور و شاهد تعیین ایتمك ایچون سڭا كورندم١٧ و سنی بو قومدن و طائفه‌لردن قورتاره‌جغم١٨ و بڭا ایمان ایتملریله كناهلرك عفوینه و مقدّسلر اراسنده نصیبه نائل اولملری ایچون كوزلرینی آچوب ظلمتدن نوره و شیطانك تسلطندن اللهه رجوع ایتدرمك اوزره سنی شمدی انلره ارسال ایدرم دیدی١٩ بوكا بناءً ای ملِك اغریپاس سماوی رؤیایه اطاعتسز اولمادم٢٠ فقط توبه ایدوب اللهه رجوع ایده‌رك توبه‌یه لایق عمللر ایشلملری ایچون اوّلا دمشق و صكره اورشلیم اهالیسنه و بتون یهودیه دیارینه و طائفه‌لره وعظ ایتدم٢١ بو سببلردن یهودیلر نبی هیكلده طوتوب قتلمه سعی ایتدیلر.٢٢ نهایت اللهك عوننه مظهر اوله‌رق بوكونه دكین باقی ایم و كوچوكه و بیوكه شهادت ایده‌رك پیغمبرلرك و موسانك واقع اوله‌جغنی خبر ویردكلری شیلردن٢٣ یعنی مسیحك الم چكه‌جكی و اولولردن اك اوّل قیام ایدوب قومه و طائفه‌لره نور تبشیر ایده‌جكندن ماعدا هیچ بر شی سویله‌دیكم یوقدر دیدی.٢٤ و جواب ویره‌رك بو شیلری سویله‌دیكنده فستوس یوكسك سسله ای پولس چیلدریورسین چوق اوقومق سنی دلیلكه دوچار ایدیور دیدی٢٥ او دخی ای دولتلو فستوس چیلدرمایورم اما حقیقت و عقل سلیم سوزلری سویله‌یورم٢٦ زیرا ملِك بو شیلره واقف اولمغله حضورنده جسورانه سویله‌یورم چونكه بو شی بر كوشه‌ده واقع اولمادیغندن قیاس ایدرمكه بو شیلرك هیچ بری بیله اڭا كیزلو دكلدر.٢٧ ای ملِك اغریپاس پیغمبرلره اینانورمیسین. ایناندیغكی بیلورم دیدی٢٨ و اغریپاس پولسه نبی خرستیان اولمغه جزئی اقناع ایدیورسین دیدی٢٩ پولس دخی كاشكی الله ویره ایدی جزئی و كلی یالڭز سن دكل آنجق بو كون نبی دیكلیانلرك جمله‌سی دخی شو بندلردن ماعدا همان بنم اولدیغم كبی اوله ایدیلر دیدی.٣٠ و [بونی سویله‌دیكی كبی] ملِك ایله والی و برنیقه و انلر ایله برابر اوتورانلر قالقدیلر٣١ و بر طرفه چكلدكلرنده بری بری ایله بو ادم قتله یا بندلره مستحق هیچ بر شی ایشلمیور دیو سویلشرلر ایدی.٣٢ اغریپاس دخی فستوسه بو ادم قیصره رفع دعوی ایتمه‌مش اولسیدی صالیویر یله‌بیلور ایدی دیدی.