١ وصباح اولدیغی كبی باش كاھنلر اختیارلروعلماایلە وبتون ملت مجلسی مشاورە ایدوب عیسایی باغلادقدنصڭرە كوتوروب پیلاطوسە تسلیم ایتدیلر٢ وپیلاطوس اڭا یهودیلرڭ ملكی سن میسین دیوسؤال ایتدی اودخی اڭا جواباًسویلدیكك كبیدر دیدی ٣ وباش كاھنلرانی چوق شیلردن طولایی اتهام ایتدكلرندە٤ ینە پیلاطوس اڭا سؤال ایدە رك ھیچ برجواب ویرمز میسین باق علیھكدە نە قدر شیلر شھادت ایدیورلر دیدی ٥ وعیسی آرتق ھیچ برجواب ویرممكلە پیلاطوس تعجّب ایتدی۔٦ وھربیرامدە انلرڭ طلب ایتدكلری برمحبوسی صالیویریور ایدی ٧ واختلال اثناسندە قتل فعلندە بولنوب فتنە چیقاران رفیقلری ایلە برابر محبوس اولان باراباس نامندە بركیمسە وارایدی۔٨ وخلق باغروب كندیلرە اولان عادتنك اجرا سندە بولنمسنی طلب ایتمكە باشلادی ٩ وپیلاطوس انلرە جواباًسزڭ ایچون یهودیلرڭ ملكنی صالیویرمە می استرمیسكز دیدی۔١٠ زیرا باش كاھنلرك انی حسدون ناشی تسلیم ایتدكلرینی بیلورایدی۔١١ لكن باش كاھنلرانڭ برینە كندیلری ایچون باراباسی صالیویرمسنی طلب ایتمك اوزرە خلقی تحریك ایتدیلر١٢ وپیلاطوس تكرارانلرە جواباًاویلە ایسە یهودیلرڭ ملكی دیدیككز كیمسە یە نە یاپمە می استرسڭز دیدی ١٣ انلر دخی انی صلب ایلە دیو تكرارنداایتدیلر١٤ لكن پیلاطوس انلرە یانە كوتولك ایشلمشدر دیدی ایسە دە انلرانی صلب ایت دیەرك دھا زیادە نداایلدیلر١٥ وپیلاطوس خلقی خوشنودایتمك استمكلە انلر ایچون بارا باسی صالیویردی وعیسایی دوكدكدنصڭرە صلب اولنمق ایچون تسلیم ایتدی۔١٦ وعسكرلرانی دیوان محلی اولان حولی ایچریسنە كوتوروب بتون بلوكی جمع ایتدیلر ١٧ واڭا ارغوانی خلعت كیدردیلرودیكندن برتاج اوروب باشنە قودیلر ١٨ وسلام سكا ای یهودیلرڭ ملكی دیەرك انی سلاملامغە باشلادیلر١٩ وقامشلە اُنڭ باشنە اوروب اوزرینە توكوررلر ودیز چوكوب اڭاتمنی ایدرلرایدی ٢٠ وانی استھزاایتدكدنصڭرە اوزرندن ارغوانی خلعتی چیقاروب اڭا كندی البسە سنی كیدردیلروخاچە كرمك ایچون طیشاری یە كوتوردیلر۔٢١ واسكندرایلە روفسك پدری سمعون نامندە قیرینالو بركیمسە رتارلادن گلوب كچرایكن بونی اُنڭ خاچنی طاشیمغە اجبارایتدیلر۔٢٢ وانی قفا یری ترجمە اولنان جلجتە نام محلە كوتوردكلرندە٢٣ اڭایچمكە مرّصافی ایلە قارشمش شراب ویردیلر اماقبول ایتمدی۔٢٤ وانی خاچە كردكدنصڭرە ھركسك حصە سی معلوم اولمق اوزرە قرعە آتە رق البسە سنی تقسیم ایتدیلر ٢٥ وانی خاچە كردكلری وقت ساعت اوچ ایدی ٢٦ وانڭ جرم یافە سی یهودیلرڭ ملكی دیو اوزرندە ایزلمش ایدی ٢٧ وبری صاغندە وبری صولندە اُنڭ ایلە برابرایكی حارمی خاچە كردیلر ٢٨ ومجرملرصرەسندە عد اولندی دیو یازلمش اولان اتمام اولندی۔٢٩ ویانندن كچنلرباشلرینی صاللایوب اڭا كفر ایدە رك وای ھیكلی ییقوب اوچ گوندە بنا ایدن ٣٠ كندوكی قورتاروخاچدن این دیرلر ایدی ٣١ كذلك باش كاھنلر ایلە علما كندی ارالرندە استھزا ایدە رك بشقەلرینی قوراردی كندیسنی قورتارمغە قادردكلدر ٣٢ اسرائیلك ملكی مسیح شمدی خاچدن اینسون بز دخی گوروب اینانە لم دیرلرایدی ان ایلە برابرصلب اولنانلردخی اڭاشتم ایدرلرایدی۔٣٣ وساعت التی یە كلدكدە تاساعت طقوزە قدربتون یراوزرندە قراڭلق اولدی ٣٤ وساعت طقوزدە عیسی یوكسك سسلە فریادایدوب الوی الوی لماسبقتانی یعنی ترجمە اولندقدە ای اللھم ای اللھم بنی نیچون ترك ایتدك دیدی ٣٥ واورادە طورانلرڭ بعضیسی بونی ایشیتدكدە اشتە ایلیایی چاغریوردیدلر ٣٦ وبری سكردوب برسونكری سركە ایلە طولدردی وبرقامشە طاقوب براقكز باقە لم ایلیاانی ایندرمكە كلورمی دیەرك اڭا ایچوردی۔٣٧ وعیسی یوكسك سسلە فریاد ایدوب تسلیم روح ایتدی٣٨ وھیكلك پردە سی یوقاریدن اشاغی یە قدر یرتیلوب ایكی سق اولدی ٣٩ وقارشوسندە طوران یوز باشی اُنڭ بویلە فریادایدوب تسلیم روح ایتدیكنی كوردیكندە حقیقۃًبوادم ابن اللە ایدی دیدی۔٤٠ واوزاقدن نظرایدن نسوان دخی بولنوب ارالرندە مجدلی مریم وكوچك یعقوب ایلە یوسانڭ والدەسی مریم وسالومی دخی وارایدی ٤١ كندیسی جلیلدە ایكن دخی مرقومەلرانڭ آردنجە گیدوب اڭا خدمت ایدرلرایدی وانڭ ایلە برابر اورشلیمە چیقمش اولان بشقە چوق نسوان دخی وارایدی۔٤٢ واقشام اولدقدە تدارك یعنی سبتدن اوّل اولان گون اولمغلە٤٣ شوری اعضاسندن اولوب معتبروملكوت اللھە منتظربولنان اریماتیالو یوسف گلوب جسارتلە پیلاطوسك یاننە كیرە رك عیسانڭ جسدینی طلب ایلدی ٤٤ وپیلاطوس اُنڭ وفات ایتمش اولدیغنە تعجّبلە یوز باشی یی چاغروب چوقدنمی وفات ایتدی دیواڭا سؤال ایتدی ٤٥ ویوز باشیدن وقوع حالی اكلامغلە جسدی یوسفە باغشلادی ٤٦ اودخی كتان بزی صاتون آلە رق جسدی ایندروب انی اول بزە صاردی وقیادە اویولمش برقبرە قویوب قبرك قپوسنە بر طاش یوارلادی ٤٧ ومجدلی مریم ایلە یوسانڭ والدەسی مریم اُنڭ قونلدیغی یرە باقیورلرایدی۔