٥
١ و جماعتلری گورمكلە طاغە چیقدی. و اوتوردیغندە شاكردلری یاننە گلدیلر٢ و آغزینی آچوب انلرە تعلیم ایدرك دیدیكە٣ نە مباركدر روحجە فقیر اولنلر زیرا ملكوت السماوات انلركدر٤ نە مباركدر محزون اولنلر زیرا انلر تسلی بولەجقلر٥ نە مباركدر حلیملر زیرا انلر زمینی میراث آلەجقلر٦ نە مباركدر صلاحە آحیقوب صوصایانلر زیرا انلر طویوریلەجقلر٧ نە مباركدر مرحمتلولر زیرا انلر مرحمتە مظھر اولەجقلر٨ نە مباركدر قلبی پاك اولنلر زیرا انلر اللھی كورەجكلر٩ نە مباركدر صلح ایدیجیلر زیرا انلرە اولاد اللّٰە تسمیە اولنەجقدر١٠ نە مباركدر صلاح سببیلە تعدّی كورنلر زیرا ملكوت السماوات انلركدر١١ بنم سببمە سزە ستم ایدوب تعدّی ایتدكلری و یالان یرە علیهكزدە ھر كونە فنا سوز سویلدكلری زمان نە مباركسكز١٢ مسرور و شادمان اولكز زیرا سماواتدە اجر كز چوقدر چونكە سزدن اوّل اولان پیغمبرلرە بویلە تعدّی ایتدیلر١٣ سز یرك طوزیسكز لكن طوز طاتسز اولدیغی تقدیردە نە ایلە طوزلنەجقدر آرتق طیشارویە آتیلوب ادملرك ایاقلری آلتندە باصلمقدن بشقە بر شیئە یراماز١٤ سز دنیانڭ نوری سكز طاغ اوزرندە واقع بر شھر كیزلنەمز١٥ و چراغی یاقوب كیلە آلتنە قومازلر اما شمعدان اوزرینە قورلر و خانەدە بولنانلرك جملەسنە ضیا ویرر١٦ بو وجھلە نوركز ادملرك اوكندە ضیا ویرسون كە سزڭ ایو عمللر كزی گوروب سماواتدە اولان پدركزی تمجید ایدەلر١٧ بن شریعتی یا پیغمبرلری ابطال ایتمك ایچون گلدم ظن ایتمیڭز انلری ابطال ایچون دكل انجق اتمام ایچون گلدم١٨ زیرا حقیقۃً سزە دیرمكە یر ایلە كوك زائل اولمدقجە شریعتك جملەسی اتمام اولنجیە دكین اندن بر حرف یا بر نقطە زائل اولمیەجقدر١٩ ایمدی ھر كیم بواك كوچك امرلرك برینی نقض ایدوبدە ادملرە اویلە تعلیم ایدرسە ملكوت السماواتدە اك كوچك دینلەجكدر. اما ھر كیم عامل اولوبدە تعلیم ایدرسە ملكوت السماواتدە بیوك دینلەجكدر٢٠ زیرا سزە دیرمكە اگر صلاحكز علما و فریسیلرك صلاحندن زیادە اولماز ایسە ملكوت السماواتە اصلا كیرمیەجكسكز٢١ اسكی زمان ادملرینە قتل ایتمیەسین و ھر كیم قتل ایدرسە حكمە مستحق اولەجقدر دینلدیكنی ایشتدیكز٢٢ فقط بن سزە دیركمە ھر كیم قرنداشنە سببسز غضب ایدرسە حكمە مستحق اولور و ھر كیم كندی قرنداشنە رقا دیرسە ملت مجلسنك حكمنە مستحق اولور و ھر كیم آحمق دیرسە جھنم آتشنە مستحق اولور٢٣ ایمدی تقدمەكی مذبحە كتوردیككدە اورادە قرنداشكك سنڭ علیهكدە بر شیئی اولدیغی خاطر كە گلور ایسە٢٤ تقدمەكی اورادە مذبحك اوكندە براق و گیدوب اوّلا قرنداشك ایلە بارش اندن صكرە گلوب تقدمەكی تقدیم ایلە٢٥ خصمك ایلە برابر یولدە ایكن چابك اُنڭ ایلە صلح اول كە خصمك سنی قاضی‌یە قاضی دخی سنی مأمورە تسلیم ایدوب زندانە آتلمیەسین٢٦ حقیقۃً سكا دیرمكە صوك منغری ادا ایتمەینجە اورادن چیقمیەجقسین.٢٧ ]اسكی زمان ادملرینە] زنا ایتمیەسین دینلدیكنی ایشتدیكز.٢٨ فقط بن سزە دیر مكە ھر كیم نسادن برینە شھوتلە باقارسە قلبندە اُنڭ ایلە زنا ایتمش اولور٢٩ ایمدی صاغ كوزك سنڭ سورچمە كە سبب اولورسە انی چیقاروب كندوكدن دفع ایت زیرا اعضاكدن برینك ضایع اولمسی بتون جسدكك جھنمە آتلمسندن سڭا خیرلودر٣٠ و اگر صاغ الك سنڭ سورچمەكە سبب اولورسە انی كسوب كندوكدن دفع ایت زیرا اعضاكدن برینك ضایع اولمسی بتون جسدكك جھنمە آتلمسندن سكا خیرلودر٣١ ھر كیم زوجەسنی بوشارسە اڭا طلاقنامە ویرسون دینلمشدر٣٢ فقط بن سزە دیرمكە ھر كیم زنادن غیری بر سببە مبنی زوجەسنی بوشارسە اڭا زنا ایتدرر و ھر كیم بوشانمش اولان ایلە اولنورسە زنا ایتمش اولور.٣٣ ینە اسكی زمان ادملرینە یالان یرە یمین ایتمیەسین انجق یمینلە وعد ایتدیككی ربە ادا ایدەسین دینلدیكنی ایشتدیكز٣٤ فقط بن سزە دیرمكە اصلا یمین ایتمیەسكز نە سما حقی ایچون زیرا اللھك تختیدر.٣٥ نە دە زمین حقی ایچون زیرا اُنڭ ایاقلرینك بصامغیدر. نە اورشلیم حقی ایچون زیرا مِلك عظیمك شهریدر٣٦ نە دە باشك حقی ایچون یمین ایدەسین زیرا بر قیلی آق یاخود قرە ایلمكە قادر دكسلین٣٧ لكن سوزكز اوت اوت خیر خیر اولسون بونلردن زیادەسی شریردندر٣٨ كوزە كوز و دیشە دیش دینلدیكنی ایشتدیكز٣٩ فقط بن سزە دیرمكە كملكە قارشو طورمیەسكز لكن ھر كیم سنڭ صاغ یناغكە اورورسە اڭا اول برینی‌دە چویر٤٠ و سنڭ ایلە دعوی ایدوب انتاركی آلمق استیانە جبەكی‌دە براق٤١ و سنی بر میل كیتمكە اجبار ایدن كیمسە ایلە ایكی میل گیت٤٢ سندن دیلیانە ویر و سندن اودنج آلمق استیاندن یوز چویرمە.٤٣ قوكشوكی سوەسین و دشمنكە بغض ایدەسین دینلدیكنی ایشتدیكز٤٤ فقط بن سزە دیرمكە دشمنلركزی سوكز. سزە بد دعا ایدنلرە خیر دعاایلیكز. سزە بغض ایدنلره ایولك ایدڭز و سزی اینجیدنلر ھم سزە تعدّی ایدنلر ایچون دعا ایدڭز٤٥ تا كە سماواتدە اولان پدركزك اولادی اولەسكز زیرا كندی كونشنی فنالر ایلە ابولر اوزرینە طوغدرور ھم صالح و فاسق كیمسەلر اوزرینە یاغمور یاغدرور٤٦ زیرا سزی سونلری سورسەكز نە اجركز اولور كمركجیلر دخی ھمان اویلە ایتمزلرمی٤٧ و اگر یالكز قرنداشلركزە سلام ویررسەكز زیادە نە ایتمش اولورسڭز كمركجیلر دخی اویلە ایتمزلرمی.٤٨ ایمدی سماواتدە اولان پدرڭز كامل اولدیغی گبی سز دخی كامل اولكز.