٤
١ او زمان عیسی شیطان طرفندن تجربە اولنمق اوزرە روحك سوقیلە بریّە كیتدی٢ و قرق گون قرق كیجە اوروج طوتوب صكرە آجیقدی٣ و تجربە ایدیجی اُنڭ یاننە گلوب اگر ابن اللّٰە ایسەك امر ایت بو طاشلر اتمك اولسونلر دیدی٤ او دخی جواباً انسان یالكز اتمكلە یاشاماز انجق اللھك آغزندن صادر اولان ھر بر كلاملە یاشار دیو یازلمشدر دیدی٥ او زمان شیطان انی مقدّس شھرە كوتوروب ھیكلك برجی اوزرینە طوردرەرق٦ اڭا اگر ابن اللّٰە ایسەك كندوكی اشاغی‌یە آت زیرا سنڭ حقڭدە كندی ملكرینە امر ایدەجكدر و ایاغكی طاشە چارپمامق ایچون سنی اللری اوزرینە قالدرە جقلر دیو یازلمشدر دیدی٧ عیسی اڭا كذلك اللھك اولان ربی تجربە ایتمیەسین دیو یازلمشدر دیدی٨ تكرار شیطان انی غایت یوكسك برطاغە كوتوروب اڭا دنیانڭ جملە ممالكی ایلە انلرك شاننی كوسترەرك٩ اڭا اگر دوشوب بڭا سجدە قیلارسەك بونلرك جملەسنی سكا ویررم دیدی١٠ او زمان عیسی اڭا آردمە چكیل ای شیطان زیرا اللھك اولان ربە سجدە قیلەسین و یالكز اڭا عبادت ایدەسین دیو یازلمشدر دیدی١١ او زمان شیطان انی ترك ایتدی و اشتە ملكلر گلوب اڭا خدمت ایتدیلر١٢ ایمدی عیسی یحیانڭ الە ویرلدیكنی ایشتدكدە جلیل طرفنە عزیمت ایلدی١٣ وناصرتی ترك ایدرك گیدوب زبولون ایلە نفتالیم سنورلرندە و دكز كنارندە بولنان كفرناحومدە ساكن اولدی١٤ تا كە اشعیا پیغمبر واسطەسیلە١٥ اردنك اوتە طرفندە دكز یولندە بولنان زبولون دیاری و نفتالیم دیاری یعنی طائفەلرك جلیلی١٦ ظلمتدە اوتوران قوم عظیم نور گوردی و اوٚلوم دیاری و كولكەسندە اوتورانلرە نور طوغدی دیو بیوریلان كلام اتمام اولنە١٧ او زماندن عیسی وعظ ایتمكە و توبە ایدڭز زیرا ملكوت السماوات یاقلاشمشدر دیمكە باشلادی١٨ و عیسی جلیل دڭزی كنارندە كزر ایكن ایكی قرنداش یعنی بطرس دینلان سمعون ایلە قرنداشی اندراوسی دڭزە آغ آتمقدە ایكن گوردی چونكە انلر بالق آوجیسی ایدیلر١٩ و انلرە آردمجە كلكز و سزی انسان آوجیسی ایدەجكم دیدی٢٠ انلر دخی در عقب آغلری براغوب اُنڭ آردنجە گیتدیلر٢١ و اورادن ایلرو گیدوب پدرلری زبدی ایلە برابر قایقدە آغلرینی تعمیر ایتمكدە بولنان دیكر ایكی قرنداشی یعنی زبدی اوغلی یعقوب ایلە قرانداشی یوحنایی گوروب انلری دخی چاغر دی٢٢ و بونلر ھمان قایغی و پدرلرینی ترك ایدرك اُنڭ آردنجە گیتدیلر٢٣ و عیسی بتون جلیلی طولاشەرق سناغوغلرندە تعلیم و ملكوتك مژدەسنی تبشیر و خلق اراسندە بولنان ھر مرضی و ھر خستەلكی دفع ایدر ایدی٢٤ و اُنڭ شھرتی سوریەنك ھر بر طرفنە شایع اولمسیلە جملە علتلولری یعنی درلو درلو مرضە و آغریلرە مبتلا اولنلری و جنلولر ایلە صرعەلولری و كوتروملری اُنڭ یاننە كتوردیلر او دخی انلرە شفا ویردی٢٥ و جلیل ایلە دقابولسدن و اورشلیم ایلە یهودیەدن و اردنك اوتە طرفندن بر چوق جماعتلر اُنڭ آردنجە گیتدیلر