٢
١ و عیسی ھیرودس مِلكڭ كونلرندە یهودیەنڭ بیت لحم شھرندە طوغدیغی زمان اشتە شرق طرفندن اورشلیمە عالملر گلوب٢ یهودیلرك طوغمش اولان مِلكی نرەدەدر زیرا شرقدە اُنڭ یلدزینی گوردك و اڭا سجدە قیلمغە كلدك دیدیلر٣ و ھیرودس مِلك بونی ایشتدكدە كندیسی و اُنڭ ایلە برابر بتون اورشلیم دخی مضطرب اولدی٤ و جملە باش كاھنلر ایلە قومك علماسنی جمع ایدوب انلردن مسیحك نرەدە طوغەجغنی سؤال ایلدی٥ انلر دخی اڭا دیدیلر كە یهودیەنڭ بیت لحم شھرندە طوغەجق زیرا پیغمبر واسطەسیلە بویلە یازلمشدر٦ یعنی ای یهودا دیاری بیت لحم یهودا امیرلری اراسندە سن دخی اصلا كوچك دكلسین زیرا قومم اسرائیلی گودەجك بر امیر سندن ظھور ایدەجكدر٧ او زمان ھیرودس عالملری گیزلوجە چاغروب یلدزك نە زمان گورندیكنی انلردن تحقیق ایتدی٨ و كیدكز معصومە دائر دقتلە معلومات آلوب انی بولدیغكز زمان بڭا خبر ویركز كە بن دخی گیدوب اڭا سجدە قیلەیم دیەرك انلری بیت لحمە كوندری٩ انلر دخی مِلكی دیكلەیوب گیتدیلر و اشتە شرقدە كوردكلری یلدز واروب معصومك بولندیغی یرك اوزرندە طوریجیە دكین اوكلرنجە كیتدی١٠ و یلدیزی كوردكلرندە زیادەسیلە مسرور اولدیلر١١ و اوە گیروب معصومی والدەسی مریم ایلە بولدیلر و دوشوب اڭا سجدە قیلدیلر و خزینەلرینی آچوب اڭا ھدیە اولەرق التون و كونلك و مرّ صافی تقدیم ایتدیلر١٢ و ھیرودسك یاننە عودت ایتمەملری انلرە رؤیادە وحی اولنمغلە كندی دیارلرینە دیكر بر یولدن عزیمت ایتدیلر١٣ و انلرك عزیمتندن صكرە اشتە ربك ملكی رؤیادە یوسفە كورینوب قالق معصوم ایله والده‌سنی آلوب مصره فرار ایلە و بن سكا سویلینجیە دكین اورادە قال زیرا ھیرودس معصومی ھلاك ایتمك ایچون آرایەجقدر دیدی١٤ او دخی قالقوب و كیجەلین معصوم ایلە والدەسنی آلوب مصرە كیتدی١٥ و ھیرودسك وفاتنە دكین اورادە قالدی تا كە اوغلمی مصردن چاغردم دیو پیغمبر واسطەسیلە رب طرفندن بیوریلان كلام اتمام اولنە١٦ او زمان ھیرودس عالملر طرفندن استهزا اولندیغنی كوردكدە غایتلە غضبە گلدی و عالملردن تحقیق ایتدیگی زمانە كورە بیت لحم ایلە ھپ سنورلرندە ایكی یاشندن اشاغی بولنان جملە چوجقلری قتل ایتدری١٧ او زمان رامەدە بر صدا یعنی فریاد و اغلایش و زیادە فغان ایشیدلدی١٨ راحیل اولادینە اغلایوب ناموجود اولدقلری ایچون تسلی قبول ایتمز ایدی دیو ارمیا پیغمبرك سویلدیكی كلام اتمام اولندی١٩ و ھیرودسك وفاتندن صكرە اشتە ربك ملكی مصردە یوسفە رؤیادە كورینوب٢٠ قالق معصوم ایلە والدەسنی آلوب اسرائیل دیارینە گیت زیرا معصومك جاننە قصد ایدنلر اوٚلدیلر دیدی٢١ او دخی قالقوب و معصوم ایلە والدەسنی آلوب اسرائیل دیارینە گلدی٢٢ لكن یهودیەدە ارخیلاوسك كندی پدری ھیرودسك یرینە مِلك اولدیغنی ایشتمكلە اورایە كیتمكە قورقدی و رؤیادە كندینە وحی اولنمغلە جلیل سمتلرینە كیتدی٢٣ و گلوب ناصرت دینلان شھردە ساكن اولدی كە ناصرتلو دینلەجكدر دیو پیغمبرلر واسطەسیلە سویلنیلان كلام اتمام اولنە